ಬೆಳಗ್ಗೆ ಖಾಲಿ ಹೊಟ್ಟೆಯಲ್ಲಿ ನಾವು ಏನು ಸೇವನೆ ಮಾಡುತ್ತೇವೆ ಅದು ನಮ್ಮ ಇಡೀ ದಿನದ ಕಾರ್ಯ ಚಟುವಟಿಕೆಯ ಮೇಲೆ ಪ್ರಭಾವ ಬೀರುತ್ತದೆ. ಹಾಗಾಗಿ ಆರೋಗ್ಯಕರವಾದ ಆಯ್ಕೆ ನಮ್ಮದಾಗಬೇಕು.
ಬೆಳಗ್ಗೆ ಎದ್ದು ಬೆಡ್ ಕಾಫಿ ಕುಡಿಯುವ ಅಭ್ಯಾಸ ಎಷ್ಟು ಜನರಿಗೆ ಇದೆ ಎಂದರೆ ಬಹುತೇಕ ಎಲ್ಲರೂ ಹೌದು ಎನ್ನುತ್ತಾರೆ. ಏಕೆಂದರೆ ಮನುಷ್ಯ ದಿನದಲ್ಲಿ ಮೂರು ಹೊತ್ತು ಆಹಾರ ಸೇವನೆ ಮಾಡಬೇಕು ಎನ್ನುವ ಪದ್ಧತಿ ಹೇಗೆ ಅಭ್ಯಾಸವಾಗಿ ಅಂದಿನಿಂದ ಇಂದಿನವರೆಗೆ ಬೆಳೆದು ಬಂದಿದೆ, ಅದೇ ರೀತಿ ಬೆಳಗಿನ ಉಪಹಾರಕ್ಕೆ ಮುಂಚೆ ಒಂದು ಲೋಟ ಕಾಫಿ ಕುಡಿಯಬೇಕು ಎನ್ನುವ ಹವ್ಯಾಸ ಕೂಡ ಅಭ್ಯಾಸವಾಗಿ ಬೆಳೆದಿದೆ.
ಕೆಲವರು ಕಾಫಿ ಬದಲು ಚಹಾ ಕೂಡ ಸೇವನೆ ಮಾಡುವ ಅಭ್ಯಾಸ ಮಾಡಿಕೊಂಡಿರುತ್ತಾರೆ. ಹಲವರು ದಿನದಲ್ಲಿ ಒಮ್ಮೆ ಕಾಫಿ ಕುಡಿದು ಹಲವು ಬಾರಿ ಚಹಾ ಕುಡಿಯುತ್ತಾರೆ.
ಆದರೆ ಖಾಲಿ ಹೊಟ್ಟೆಯಲ್ಲಿ ಕಾಫಿ ಕುಡಿಯುವುದು ಅಥವಾ ಚಹಾ ಕುಡಿಯುವುದು ಅಷ್ಟು ಸಮಂಜಸವಲ್ಲ ಎಂಬುದು ಆರೋಗ್ಯ ತಜ್ಞರ ವಾದ. ಖಾಲಿ ಹೊಟ್ಟೆಯಲ್ಲಿ ಈ ಪಾನೀಯಗಳನ್ನು ಕುಡಿಯುವುದರಿಂದ ದೇಹದ ಆರೋಗ್ಯಕ್ಕೆ ನಷ್ಟ ಉಂಟಾಗಲಿದೆ ಜೊತೆಗೆ ಕೆಲವು ಮಾರಕ ಪ್ರಭಾವಗಳು ಕಂಡುಬರುವ ಸಾಧ್ಯತೆ ಇದೆ ಎಂದು ಹೇಳುತ್ತಾರೆ.
ಹಾಗಾದರೆ ಬೇರೆ ಯಾವ ಸಮಯದಲ್ಲಿ ಚಹಾ ಅಥವಾ ಕಾಫಿ ಕುಡಿದರೆ ಆರೋಗ್ಯಕ್ಕೆ ಒಳ್ಳೆಯದು ಎಂಬುದನ್ನು ಈ ಲೇಖನದಲ್ಲಿ ತಿಳಿದುಕೊಳ್ಳೋಣ.
ಖಾಲಿಹೊಟ್ಟೆಯಲ್ಲಿ ಕಾಫಿ ಅಥವಾ ಚಹಾ ಏಕೆ ಕುಡಿಯಬಾರದು?
- ನಿಮಗೆಲ್ಲ ಗೊತ್ತಿರುವ ಹಾಗೆ ಕಾಫಿ ಮತ್ತು ಚಹಾ ಕುಡಿದರೆ ಹೊಟ್ಟೆಯಲ್ಲಿ ಗ್ಯಾಸ್ಟ್ರಿಕ್ ಉಂಟಾಗುತ್ತದೆ. ಅಂದರೆ ಈ ಪಾನೀಯಗಳಲ್ಲಿ ಆಮ್ಲಿಯ ಪ್ರಭಾವ ಹೆಚ್ಚಾಗಿದೆ.
- ಇದು ನಮ್ಮ ಹೊಟ್ಟೆಯಲ್ಲಿ ಕಂಡುಬರುವ ಆಮ್ಲಿಯ ಅಂಶದ ಸಮತೋಲನವನ್ನು ಹೆಚ್ಚು ಕಡಿಮೆ ಮಾಡುತ್ತದೆ. ಅಜೀರ್ಣತೆ ಸಮಸ್ಯೆಯನ್ನು ಇದು ಮತ್ತಷ್ಟು ಹೆಚ್ಚು ಬರುವ ಸಾಧ್ಯತೆ ಇರುತ್ತದೆ. ಕಾಫಿ ಅಥವಾ ಚಹಾ ಕುಡಿದ ನಂತರ ದೇಹದಲ್ಲಿ ನಿರ್ಜಲೀಕರಣ ಸಮಸ್ಯೆ ಎದುರಾಗುವುದು ಅಪ್ಪಟ ಸತ್ಯ.
- ಇದರಿಂದ ಮಲಬದ್ಧತೆ ಸಮಸ್ಯೆ ಎದುರಾಗುತ್ತದೆ. ಬೆಳಗಿನ ಸಮಯದಲ್ಲಿ ಖಾಲಿಹೊಟ್ಟೆಯಲ್ಲಿ ಕಾಫಿ ಅಥವಾ ಚಹಾ ಕುಡಿಯುವುದರಿಂದ ಬಾಯಲ್ಲಿ ಕಂಡು ಬರುವ ಬ್ಯಾಕ್ಟೀರಿಯಾಗಳು ಹಲ್ಲುಗಳ ಭಾಗದಲ್ಲಿ ಹಾಗೂ ಒಸಡಿನ ತಳಭಾಗದಲ್ಲಿ ಆಮ್ಲಿಯ ಅಂಶವನ್ನು ಹೆಚ್ಚು ಮಾಡಿ ಬಾಯಿಯ ಅನಾರೋಗ್ಯಕ್ಕೆ ಕಾರಣವಾಗುತ್ತದೆ.
- ಇದೇ ಕಾರಣಕ್ಕೆ ಬೆಳಗಿನ ಸಮಯದಲ್ಲಿ ಅದರಲ್ಲೂ ಖಾಲಿ ಹೊಟ್ಟೆಯಲ್ಲಿ ಕಾಫಿ ಅಥವಾ ಚಹಾ ಕುಡಿಯುವ ಅಭ್ಯಾಸವನ್ನು ಯಾರು ಸಹ ಒಪ್ಪುವುದಿಲ್ಲ.
ಬೇರೆ ಯಾವ ಸಮಯದಲ್ಲಿ ಕಾಫಿ ಅಥವಾ ಚಹಾ ಕುಡಿಯಬಹುದು?
- ನೀವು ಬೆಳಗಿನ ಉಪಹಾರ ಸೇವನೆ ಮಾಡಿದ ಅಥವಾ ಮಧ್ಯಾಹ್ನ ಇಲ್ಲವೇ ರಾತ್ರಿ ಊಟ ಮಾಡಿದ ತಕ್ಷಣವೇ ಕಾಫಿ ಅಥವಾ ಚಹಾ ಕುಡಿಯುವುದು ತಪ್ಪು. ಅಂದರೆ ನೀವು ಆಹಾರಸೇವನೆ ಮಾಡಿದ ಸುಮಾರು ಎರಡು ಗಂಟೆಗಳ ನಂತರ ಬೇಕಾದರೆ ಕಾಫಿ ಅಥವಾ ಚಹಾ ಕುಡಿಯಬಹುದು.
- ಬೆಳಗಿನ ಸಮಯದಲ್ಲೂ ಕೂಡ ನೀವು ಹೊಟ್ಟೆಗೆ ಬೇರೆ ಯಾವುದಾದರೂ ಆಹಾರ ಸೇವನೆ ಮಾಡಿದ ನಂತರವಷ್ಟೇ ಕೆಫಿನ್ ಅಂಶ ಇರುವ ಕಾಫಿ ಅಥವಾ ಚಹಾವನ್ನು ಸೇವನೆ ಮಾಡಬಹುದು. ಇನ್ನು ಸಂಜೆಯ ಸಮಯದಲ್ಲಿ ನೀವು ಯಾವುದಾದರೂ ಸ್ಯಾಕ್ಸ್ ಸೇವನೆ ಮಾಡುವಾಗ ಜೊತೆಯಲ್ಲಿ ಕಾಫಿ ಇಲ್ಲವೆಂದರೆ ಚಹಾ ಕುಡಿಯಬಹುದು.
ವ್ಯಾಯಾಮ ಮಾಡುವ ಮುನ್ನ
- ವ್ಯಾಯಾಮ ಮಾಡುವ ಮುಂಚೆ ಕಾಫಿ ಕುಡಿಯುವುದು ಒಳ್ಳೆಯ ಅಭ್ಯಾಸ ಎಂದು ಹೇಳುತ್ತಾರೆ. ಏಕೆಂದರೆ ಇದು ದೇಹಕ್ಕೆ ಬೇಕಾದ ಅಗತ್ಯವಾದ ಪ್ರಮಾಣದ ಶಕ್ತಿಯನ್ನು ಕೊಡುತ್ತದೆ ಜೊತೆಗೆ ದೇಹದಲ್ಲಿ ಕಂಡುಬರುವ ಅಪಾರ ಪ್ರಮಾಣದ ಕ್ಯಾಲೊರಿಗಳನ್ನು ಕರಗಿಸುವಲ್ಲಿ ನೆರವಾಗುತ್ತದೆ.
- ರಾತ್ರಿ ಮಲಗುವ ಮುಂಚೆ ಯಾವುದೇ ಕಾರಣಕ್ಕೂ ಕಾಫಿ ಕುಡಿಯಬೇಡಿ. ಮೊದಲೇ ಹೇಳಿದಂತೆ ಕಾಫಿ ಅಥವಾ ಚಹಾದಲ್ಲಿ ಕಂಡು ಬರುವ ಕೆಫೀನ್ ಅಂಶ ಮೂತ್ರ ವರ್ಧಕ ಗುಣ ಲಕ್ಷಣಗಳನ್ನು ಒಳಗೊಂಡಿದ್ದು, ಹಲವು ಬಾರಿ ಮೂತ್ರ ವಿಸರ್ಜನೆ ಮಾಡುವಂತೆ ರಾತ್ರಿಯ ಸಮಯದಲ್ಲಿ ನಿಮಗೆ ನಿದ್ರೆಗೆ ತೊಂದರೆ ಮಾಡಬಹುದು.
ಕಾಫಿ ಅಥವಾ ಚಹಾ ಬದಲು ಬೆಳಗಿನ ಸಮಯದಲ್ಲಿ ಹೊಟ್ಟೆಯಲ್ಲಿ ಏನು ಕುಡಿಯಬಹುದು?
- ಬೆಳಗಿನ ಸಮಯದ ಖಾಲಿ ಹೊಟ್ಟೆಯಲ್ಲಿ, ನಿಂಬೆಹಣ್ಣಿನ ರಸ ಜೊತೆಗೆ ಸ್ವಲ್ಪ ಉಪ್ಪು ಮತ್ತು ಚಿಟಿಕೆ ಕಾಳು ಮೆಣಸಿನಪುಡಿ ಬೆರೆಸಿದ ಪಾನೀಯವನ್ನು ಆರೋಗ್ಯಕರವಾಗಿ ಸೇವನೆ ಮಾಡಬಹುದು.
- ಇದು ನಿಮ್ಮ ದೇಹದ ರೋಗನಿರೋಧಕ ಶಕ್ತಿಯನ್ನು ಹೆಚ್ಚಿಸುವುದು ಮಾತ್ರವಲ್ಲ ದೇಹದ ತೂಕವನ್ನು ಕಡಿಮೆ ಮಾಡುತ್ತದೆ ಮತ್ತು ನಿಮ್ಮ ದೇಹದಲ್ಲಿ ಬೊಜ್ಜಿನ ಪ್ರಮಾಣವನ್ನು ತಗ್ಗಿಸುತ್ತದೆ.
- ಇದನ್ನು ಬಿಟ್ಟರೆ ಅಮೃತಬಳ್ಳಿಯ ಕಷಾಯ ಅಥವಾ ನೆಲ್ಲಿಕಾಯಿ ರಸ ಸೇವನೆ ಮಾಡಿದರೆ ಯಾವುದೇ ಬಗೆಯ ಸೋಂಕುಗಳಿಂದ ಪಾರಾಗುವ ಪ್ರಮಾಣದಲ್ಲಿ ನಿಮ್ಮ ದೇಹದ ರೋಗನಿರೋಧಕ ಶಕ್ತಿ ಸದೃಢವಾಗುತ್ತಾ ಹೋಗುತ್ತದೆ.
ಹೀಗೆ ಮಾಡಿ ನೋಡಿ
- ಇನ್ನೊಂದು ಉಪಾಯವೆಂದರೆ, ಒಂದು ಟೀ ಚಮಚ ಮೆಂತ್ಯ ಕಾಳುಗಳನ್ನು ಅಥವಾ ಒಂದು ಟೀ ಚಮಚ ಜೀರಿಗೆ ಕಾಳುಗಳನ್ನು ಇಲ್ಲವೆಂದರೆ ಒಂದು ಟೀ ಚಮಚ ಸೋಂಪು ಕಾಳುಗಳನ್ನು ಇಡಿ ರಾತ್ರಿ ನೀರಿನಲ್ಲಿ ನೆನೆಹಾಕಿ ಬೆಳಗಿನ ಸಮಯದಲ್ಲಿ ಇದನ್ನು ಸೋಸಿಕೊಂಡು ಖಾಲಿ ಹೊಟ್ಟೆಯಲ್ಲಿ ಕುಡಿಯುವ ಅಭ್ಯಾಸ ಮಾಡಿಕೊಳ್ಳಬಹುದು.
- ಆದರೆ ಇದನ್ನು ಸ್ವಲ್ಪ ಉಗುರು ಬೆಚ್ಚಗೆ ಮಾಡಿ ಕುಡಿಯುವುದು ಒಳ್ಳೆಯದು.ಕೆಲವರು ಸದಾ ಹೆಚ್ಚು ಸೋಮಾರಿಗಳಾಗಿ ಇರುತ್ತಾರೆ, ಇಡೀ ದಿನ ಯಾವುದೇ ಕೆಲಸದ ಮೇಲೆ ಆಸಕ್ತಿ ತೋರಿಸುವುದಿಲ್ಲ.
- ಅಂತಹವರು ಅರ್ಧ ಟೀ ಚಮಚ ಫ್ಲಾಕ್ಸ್ ಬೀಜಗಳ ಪುಡಿಯನ್ನು ಉಗುರು ಬೆಚ್ಚಗಿನ ನೀರಿನಲ್ಲಿ ಹಾಕಿ ಪ್ರತಿ ದಿನ ಖಾಲಿ ಹೊಟ್ಟೆಯಲ್ಲಿ ಬೆಳಗಿನ ಸಮಯದಲ್ಲಿ ಸೇವನೆ ಮಾಡುವ ಅಭ್ಯಾಸ ಮಾಡಿಕೊಳ್ಳಬಹುದು.
- ಇದು ದೇಹದ ಮೇಲೆ ಆಂಟಿ ಆಕ್ಸಿಡೆಂಟ್ ಪ್ರಭಾವವನ್ನು ಉಂಟು ಮಾಡಿ ದೇಹದಲ್ಲಿ ಮೆಟಬಾಲಿಸಂ ಪ್ರಕ್ರಿಯೆ ಚುರುಕಾಗಿ ನಡೆಯುವಂತೆ ಮಾಡುತ್ತದೆ. ಇದರಿಂದ ಸೋಮಾರಿತನ ದೂರವಾಗಲು ಸಹಾಯವಾಗುತ್ತದೆ.