ಕನಿಷ್ಠ ಎರಡು ಸಂದರ್ಭಗಳಲ್ಲಿ, ಟ್ರಂಪ್ ಅವರು ತಮ್ಮ ಬೆಡ್‌ಮಿನ್‌ಸ್ಟರ್, ನ್ಯೂಜೆರ್ಸಿ, ಗಾಲ್ಫ್ ಕ್ಲಬ್‌ನಲ್ಲಿ ಯುಎಸ್ ಮಿಲಿಟರಿ ಕಾರ್ಯಾಚರಣೆಗಳು ಮತ್ತು ಅವುಗಳನ್ನು ನೋಡಲು ಅನುಮತಿಸದ ಜನರಿಗೆ ರಹಸ್ಯ ದಾಖಲೆಗಳನ್ನು ತೋರಿಸಿದರು ಎಂದು ದೋಷಾರೋಪಣೆಯಲ್ಲಿ ಹೇಳಿದೆ.
ಡೊನಾಲ್ಡ್ ಟ್ರಂಪ್
ವಾಷಿಂಗ್ಟನ್: ಶ್ವೇತಭವನದಿಂದ (White House) ನಿರ್ಗಮಿಸಿದ ನಂತರ ಉನ್ನತ ರಹಸ್ಯ ಪರಮಾಣು ಮತ್ತು ರಕ್ಷಣಾ ದಾಖಲೆಗಳನ್ನು ತಮ್ಮಲ್ಲೇ ಇಟ್ಟುಕೊಳ್ಳುವ ಮೂಲಕ ಮಾಜಿ ಯುಎಸ್ ಅಧ್ಯಕ್ಷರು ರಾಷ್ಟ್ರೀಯ ಭದ್ರತೆಗೆ ಅಪಾಯವನ್ನುಂಟುಮಾಡಿದ್ದಾರೆ ಎಂದು ಆರೋಪಿಸಿ ಫೆಡರಲ್ ಪ್ರಾಸಿಕ್ಯೂಟರ್‌ಗಳು ಶುಕ್ರವಾರ (Donald Trump) ಅವರ ವ್ಯಾಪಕ ದೋಷಾರೋಪಣೆಯನ್ನು ಬಹಿರಂಗಪಡಿಸಿದ್ದಾರೆ. 2024 ರ ಅಧ್ಯಕ್ಷ ಸ್ಥಾನದ ರಿಪಬ್ಲಿಕನ್ ಆಕಾಂಕ್ಷಿಯಾಗಿರುವ 76 ವರ್ಷದ ಟ್ರಂಪ್, ಫ್ಲೋರಿಡಾದ ಮಾರ್-ಎ-ಲಾಗೊ ( Mar-a-Lago) ನಿವಾಸಕ್ಕೆ ಕಾರ್ಡ್ಬೋರ್ಡ್ ಪೆಟ್ಟಿಗೆಗಳಲ್ಲಿ “ನೂರಾರು” ವರ್ಗೀಕೃತ ಸರ್ಕಾರಿ ದಾಖಲೆಗಳನ್ನು ತೆಗೆದುಕೊಂಡು ಹೋಗಿದ್ದಾರೆ ಎಂದು 49 ಪುಟಗಳ ಚಾರ್ಜ್ ಶೀಟ್ ಹೇಳಿದೆ.
ಪೆಂಟಗನ್, ಸಿಐಎ ಮತ್ತು ರಾಷ್ಟ್ರೀಯ ಭದ್ರತಾ ಏಜೆನ್ಸಿಯ ದಾಖಲೆಗಳನ್ನು ಒಳಗೊಂಡಿರುವ ಫೈಲ್‌ಗಳನ್ನು ಟ್ರಂಪ್ ಅವರು ಮಾರ್-ಎ-ಲಾಗೊದಲ್ಲಿ ಅಸುರಕ್ಷಿತವಾಗಿ ಇಟ್ಟುಕೊಂಡಿದ್ದಾರೆ. ಮಾರ್-ಎ-ಲಾಗೊದಲ್ಲಿ ಆಗಾಗ್ಗೆ ಹತ್ತಾರು ಅತಿಥಿಗಳನ್ನು ಒಳಗೊಂಡ ದೊಡ್ಡ ಸಾಮಾಜಿಕ ಕಾರ್ಯಕ್ರಮಗಳನ್ನು ನಡೆಸಲಾಗುತ್ತಿದೆ ಎಂದು ದೋಷಾರೋಪಣೆಯಲ್ಲಿ ತಿಳಿಸಲಾಗಿದೆ. ಕನಿಷ್ಠ ಎರಡು ಸಂದರ್ಭಗಳಲ್ಲಿ, ಟ್ರಂಪ್ ಅವರು ತಮ್ಮ ಬೆಡ್‌ಮಿನ್‌ಸ್ಟರ್, ನ್ಯೂಜೆರ್ಸಿ, ಗಾಲ್ಫ್ ಕ್ಲಬ್‌ನಲ್ಲಿ ಯುಎಸ್ ಮಿಲಿಟರಿ ಕಾರ್ಯಾಚರಣೆಗಳು ಮತ್ತು ಅವುಗಳನ್ನು ನೋಡಲು ಅನುಮತಿಸದ ಜನರಿಗೆ ರಹಸ್ಯ ದಾಖಲೆಗಳನ್ನು ತೋರಿಸಿದರು ಎಂದು ಅದು ಹೇಳಿದೆ.
ನಿರ್ದಿಷ್ಟ ದಾಖಲೆಗಳಿಗೆ ಸಂಬಂಧಿಸಿದ ರಾಷ್ಟ್ರೀಯ ರಕ್ಷಣಾ ಮಾಹಿತಿಯನ್ನು ಉದ್ದೇಶಪೂರ್ವಕವಾಗಿ ಉಳಿಸಿಕೊಳ್ಳುವ 31 ಆರೋಪ ಸೇರಿದಂತೆ ದೋಷಾರೋಪಣೆಯಲ್ಲಿ ಟ್ರಂಪ್ 37 ಪ್ರತ್ಯೇಕ ಆರೋಪಗಳನ್ನು ಎದುರಿಸುತ್ತಿದ್ದಾರೆ. ಪ್ರತಿ ಆರೋಪ ಸಾಬೀತಾದರೆ ಅವರು 10 ವರ್ಷಗಳವರೆಗೆ ಜೈಲು ಶಿಕ್ಷೆಯನ್ನು ಅನುಭವಿಸಬೇಕಾಗುತ್ತದೆ.
ನಾವು ಈ ದೇಶದಲ್ಲಿ ಒಂದು ಕಾನೂನುಗಳನ್ನು ಹೊಂದಿದ್ದೇವೆ. ಅವು ಎಲ್ಲರಿಗೂ ಅನ್ವಯಿಸುತ್ತವೆ ಎಂದು ಫೆಡರಲ್ ಕ್ರಿಮಿನಲ್ ಆರೋಪಗಳನ್ನು ಎದುರಿಸಿದ ಮೊದಲ ಯುಎಸ್ ಮಾಜಿ ಅಧ್ಯಕ್ಷ ಟ್ರಂಪ್ ವಿರುದ್ಧ ಐತಿಹಾಸಿಕ ದೋಷಾರೋಪಣೆಯನ್ನು ತಂದ ವಿಶೇಷ ವಕೀಲ ಜಾಕ್ ಸ್ಮಿತ್ ಹೇಳಿದರು.
ರಾಷ್ಟ್ರೀಯ ರಕ್ಷಣಾ ಮಾಹಿತಿಯನ್ನು ರಕ್ಷಿಸುವ ಕಾನೂನುಗಳು ಅಮೆರಿಕದ ಸುರಕ್ಷತೆ ಮತ್ತು ಭದ್ರತೆಗೆ ನಿರ್ಣಾಯಕವಾಗಿವೆ. ಅವುಗಳನ್ನು ಜಾರಿಗೊಳಿಸಬೇಕು ಎಂದು ಸ್ಮಿತ್ ಹೇಳಿದ್ದಾರೆ. ಅದೇ ವೇಳೆ ಟ್ರಂಪ್ ವಿಚಾರಣೆ ವೇಗ ಪಡೆದುಕೊಳ್ಳಲು ಶ್ರಮಿಸುವುದಾಗಿ ಅವರು ಹೇಳಿದ್ದಾರೆ.
ಎರಡು ಬಾರಿ ದೋಷಾರೋಪಣೆಗೆ ಒಳಗಾದ ಟ್ರಂಪ್ ಎದುರಿಸುತ್ತಿರುವ ಇತರ ಆರೋಪಗಳೆಂದರೆ ನ್ಯಾಯಕ್ಕೆ ಅಡ್ಡಿಪಡಿಸುವ ಸಂಚು, ದಾಖಲೆಯನ್ನು ತಡೆಹಿಡಿಯುವುದು, ಸುಳ್ಳು ಹೇಳಿಕೆಗಳನ್ನು ನೀಡುವುದು. ಇದು 20 ವರ್ಷಗಳವರೆಗೆ ಜೈಲು ಶಿಕ್ಷೆಯನ್ನು ಹೊಂದಿದೆ.
ಟ್ರಂಪ್ ದಾಖಲೆಗಳನ್ನು ಎಲ್ಲೆಲ್ಲಿ ಅಡಗಿಸಿದ್ದರು?
ಟ್ರಂಪ್ ಅವರ ವೈಯಕ್ತಿಕ ಸಹಾಯಕ ವಾಲ್ಟ್ ನೌಟಾ ಅವರನ್ನು ಸಹ-ಪಿತೂರಿಗಾರ ಎಂದು ಹೆಸರಿಸಲಾಗಿದೆ. ದೋಷಾರೋಪಣೆಯ ಪ್ರಕಾರ ಟ್ರಂಪ್ ಅವರ ಮಲಗುವ ಕೋಣೆ ಮತ್ತು ಶೇಖರಣಾ ಕೊಠಡಿ,ಬಾಲ್ ರೂಂ, ಸ್ನಾನಗೃಹ ಸೇರಿದಂತೆ ಮಾರ್-ಎ-ಲಾಗೋದ ವಿವಿಧ ಸ್ಥಳಗಳಲ್ಲಿ ಇರಿಸಲಾಗಿದ್ದ ದಾಖಲೆಗಳನ್ನು ಮರೆಮಾಡಲು ಟ್ರಂಪ್‌ಗೆ ಸಹಾಯ ಮಾಡಿದ್ದಕ್ಕಾಗಿ ಆರು ಆರೋಪಗಳನ್ನು ಹೊರಿಸಲಾಗಿದೆ.
ಟ್ರಂಪ್ ಅವರು ಪೆಟ್ಟಿಗೆಗಳಲ್ಲಿ ಸಂಗ್ರಹಿಸಲಾದ ವರ್ಗೀಕೃತ ದಾಖಲೆಗಳಲ್ಲಿ ಯುನೈಟೆಡ್ ಸ್ಟೇಟ್ಸ್ ಮತ್ತು ವಿದೇಶಗಳ ರಕ್ಷಣಾ ಮತ್ತು ಶಸ್ತ್ರಾಸ್ತ್ರ ಸಾಮರ್ಥ್ಯಗಳ ಬಗ್ಗೆ ಮಾಹಿತಿಯನ್ನು ಒಳಗೊಂಡಿತ್ತು ಎಂದು ದೋಷಾರೋಪಣೆಯಲ್ಲಿ ಹೇಳಲಾಗಿದೆ. ಅಮೆರಿಕದ ಪರಮಾಣು ಕಾರ್ಯಕ್ರಮಗಳು ಮತ್ತು ಯುನೈಟೆಡ್ ಸ್ಟೇಟ್ಸ್ ಮತ್ತು ಅದರ ಮಿತ್ರರಾಷ್ಟ್ರಗಳ ಮಿಲಿಟರಿ ದಾಳಿಯ ಸಂಭಾವ್ಯ ದುರ್ಬಲತೆಗಳ ಜೊತೆಗೆ ಪ್ರತೀಕಾರದ ಯೋಜನೆಗಳ ಕುರಿತು ಇರುವ ದಾಖಲೆಗಳಾಗಿವೆ.
ಈ ವರ್ಗೀಕೃತ ದಾಖಲೆಗಳ ಅನಧಿಕೃತ ಬಹಿರಂಗಪಡಿಸುವಿಕೆಯು ಅಮೆರಿಕ, ವಿದೇಶಿ ಸಂಬಂಧಗಳು, ಯುನೈಟೆಡ್ ಸ್ಟೇಟ್ಸ್ ಮಿಲಿಟರಿಯ ಸುರಕ್ಷತೆ ಮತ್ತು ಮಾನವ ಮೂಲಗಳ ರಾಷ್ಟ್ರೀಯ ಭದ್ರತೆಗೆ ಅಪಾಯವನ್ನುಂಟುಮಾಡುತ್ತದೆ ಎಂದು ದೋಷಾರೋಪಣೆಯಲ್ಲಿ ಹೇಳಲಾಗಿದೆ.
ಪ್ರಕರಣದ ಮೊದಲ ವಿಚಾರಣೆಗಾಗಿ ಟ್ರಂಪ್ ಮಂಗಳವಾರ ಮಧ್ಯಾಹ್ನ 3:00 ಗಂಟೆಗೆ (1900 GMT) ಮಿಯಾಮಿಯಲ್ಲಿ ನ್ಯಾಯಾಲಯಕ್ಕೆ ಹಾಜರಾಗಲಿದ್ದಾರೆ.
ಅಮೆರಿಕದ ಮಾಧ್ಯಮಗಳ ಪ್ರಕಾರ, ಈ ಪ್ರಕರಣವನ್ನು ಆರಂಭದಲ್ಲಿ ಟ್ರಂಪ್ ನೇಮಿಸಿದ ನ್ಯಾಯಾಧೀಶರಾದ ಐಲೀನ್ ಕ್ಯಾನನ್, 42 ಅವರು ನಿರ್ವಹಿಸುತ್ತಾರೆ, ಅವರು ಆಗಸ್ಟ್ 2022 ರ ಎಫ್‌ಬಿಐ ದಾಳಿಯಲ್ಲಿ ಮಾರ್-ಎ-ಲಾಗೊದಲ್ಲಿ ವಶಪಡಿಸಿಕೊಂಡ ದಾಖಲೆಗಳ ನ್ಯಾಯಾಲಯದ ಪರಿಶೀಲನೆಯ ಸಂದರ್ಭದಲ್ಲಿ ಮಾಜಿ ಅಧ್ಯಕ್ಷರಿಗೆ ಅನುಕೂಲಕರವಾದ ತೀರ್ಪುಗಳನ್ನು ನೀಡಿದರು.
ದೋಷಾರೋಪಣೆಯ ಪ್ರಕಾರ, ಎಫ್‌ಬಿಐ ಮತ್ತು ಅವರ ಸ್ವಂತ ವಕೀಲರಿಂದ ದಾಖಲೆಗಳನ್ನು ಹೊಂದಿರುವ ಪೆಟ್ಟಿಗೆಗಳನ್ನು ಮರೆಮಾಚಲು ಟ್ರಂಪ್ ತನ್ನ ಸಹಾಯಕ ನೌಟಾಗೆ ನಿರ್ದೇಶಿಸಿದರು ಮತ್ತು ಅಧಿಕಾರಿಗಳು ಹುಡುಕುತ್ತಿರುವ ದಾಖಲೆಗಳನ್ನು ಮರೆಮಾಡಲು ಅಥವಾ ನಾಶಪಡಿಸಲು ತಮ್ಮ ವಕೀಲರಿಗೆ ಸೂಚಿಸಿದರು.
ಟ್ರಂಪ್ ಮತ್ತು ಅವರ ವಕೀಲರೊಬ್ಬರ ನಡುವಿನ ಸಂಭಾಷಣೆಯ ಬಗ್ಗೆ ಇರುವ ದೋಷಾರೋಪಣೆಯಲ್ಲಿ ಮಾಜಿ ಅಧ್ಯಕ್ಷರು ನಮ್ಮಲ್ಲಿ ಏನೂ ಇಲ್ಲ ಎಂದು ನಾವು ಅವರಿಗೆ ಹೇಳಿದರೆ ಉತ್ತಮವಲ್ಲವೇ” ಎಂದು ಹೇಳಿರುವುದಾಗಿ ವರದಿಯಾಗಿದೆ.
ಟ್ರಂಪ್ ಅವರು ಗುರುವಾರ ತಮ್ಮ ಟ್ರುಥ್ ಸೋಷಿಯಲ್ ಮೀಡಿಯಾದಲ್ಲಿ ಭ್ರಷ್ಟ ಬೈಡನ್ ಆಡಳಿತದಿಂದ ದೋಷಾರೋಪಣೆ ಮಾಡಿದ್ದು, ಇದು ಬಾಕ್ಸೆಸ್ ಹೋಕ್ಸ್ ಎಂದಿದ್ದಾರೆ. ಇಲ್ಲಿ ಪೋಸ್ಟ್ ಮಾಡಿದ ವಿಡಿಯೊದಲ್ಲಿ ಟ್ರಂಪ್ ತಾನು ನಿರಪರಾಧಿ ಎಂದು ಹೇಳಿದರು. ಅಧ್ಯಕ್ಷ ಜೋ ಬೈಡನ್ ಮಾಡಿದ ನ್ಯಾಯಾಂಗ ಇಲಾಖೆಯ ಚುನಾವಣಾ ಹಸ್ತಕ್ಷೇಪ ಇದು ಎಂದು ದೂರಿದ್ದಾರೆ.
ಅವರು ನನ್ನ ಹಿಂದೆ ಬರುತ್ತಾರೆ. ಏಕೆಂದರೆ ಈಗ ನಾವು ಮತ್ತೆ ಮತದಾನದಲ್ಲಿ ಬೈಡನ್ ವಿರುದ್ಧ ಸಾಕಷ್ಟು ಮುನ್ನಡೆ ಸಾಧಿಸಿದ್ದೇವೆ ಎಂದು ಟ್ರಂಪ್ ಹೇಳಿದರು.
ಟ್ರಂಪ್ ಅವರ ತನಿಖೆಯನ್ನು ನಡೆಸಲು ಸ್ಮಿತ್ ಅವರನ್ನು ವಿಶೇಷ ಸಲಹೆಗಾರರನ್ನಾಗಿ ನೇಮಿಸಿದ ಅಟಾರ್ನಿ ಜನರಲ್ ಮೆರಿಕ್ ಗಾರ್ಲ್ಯಾಂಡ್ ಅವರೊಂದಿಗೆ ಯಾವುದೇ ಸಂಪರ್ಕವನ್ನು ಹೊಂದಿಲ್ಲ ಎಂದು ಬೈಡನ್ ಶುಕ್ರವಾರ ಹೇಳಿದ್ದಾರೆ. ನಾನು ಅವರೊಂದಿಗೆ ಮಾತನಾಡಿಲ್ಲ. ನಾನು ಅವರೊಂದಿಗೆ ಮಾತನಾಡಲು ಹೋಗುವುದಿಲ್ಲ. ಆ (ಪ್ರಕರಣ) ಬಗ್ಗೆ ನನಗೆ ಯಾವುದೇ ಪ್ರತಿಕ್ರಿಯೆ ಇಲ್ಲ ಎಂದು ಸುದ್ದಿಗಾರರೊಂದಿಗೆ ಮಾತನಾಡಿದ ಬೈಡನ್ ಹೇಳಿದ್ದಾರೆ.
ಟ್ರಂಪ್ ಅವರು ಈಗಾಗಲೇ ಅಪರಾಧದ ಆರೋಪ ಹೊರಿಸಲಾದ ಮೊದಲ ಮಾಜಿ ಅಥವಾ ಹಾಲಿ ಅಧ್ಯಕ್ಷರಾಗಿದ್ದಾರೆ. ವಿಶೇಷ ಸಲಹೆಗಾರರಾದ ಸ್ಮಿತ್, ಟ್ರಂಪ್ ಅವರ ಬೆಂಬಲಿಗರು 2021 ರ ಜನವರಿಯಲ್ಲಿ ಯುಎಸ್ ಕ್ಯಾಪಿಟಲ್ ಮೇಲೆ ನಡೆಸಿದ ದಾಳಿಯ ಬಗ್ಗೆ ಆರೋಪಗಳನ್ನು ಎದುರಿಸಬೇಕೇ ಎಂದು ಪರಿಶೀಲಿಸುತ್ತಿದ್ದಾರೆ. ಅದೇ ವೇಳೆ ಜಾರ್ಜಿಯಾ ಪ್ರಾಸಿಕ್ಯೂಟರ್‌ಗಳು ದಕ್ಷಿಣ ರಾಜ್ಯದಲ್ಲಿ 2020 ರ ಅಧ್ಯಕ್ಷೀಯ ಚುನಾವಣಾ ಫಲಿತಾಂಶವನ್ನು ರದ್ದುಗೊಳಿಸಲು ಟ್ರಂಪ್ ಅಕ್ರಮವಾಗಿ ಪ್ರಯತ್ನಿಸಿದ್ದಾರೆಯೇ ಎಂದು ತನಿಖೆ ನಡೆಸುತ್ತಿದ್ದಾರೆ.